Nunavut tapersersuilluarlunilu nalituumik tapiissuteqarpoq
AWG2016-ip allaffeqarfianeersut ulluni makkunani Nunavut illoqarfiisa pingaarnersaanni Iqalunniipput, tassanilu ullumi 11. September Iqaluit illoqarfiata sikumi arsaarartarfiisa AWG2016-imit atorneqarsinnaaneri pillugit tapersiilluni isumaqatigiissummik atsioqatigiittoqarluni.
Isumaqatigiissut 88.000 kr.-init sinnerlugit naleqarpoq taamaalillunilu Iqaluit tapersersuisutut Aqissimik taaguuserneqarsimasutut inissippoq. Tamatuma saniatigut Nunavut Naalaakkersuisuisa Iqalunni atuarfiit akeqanngitsumik AWG2016-mut atukkiunnissaat akuersaarpaat. Atuarfiit unnuisarfittut aaqqissuussanullu allanut AWG2016-ip ataani ingerlanneqartussanut atorneqassapput.
- Nuannaarutigeqaarput Naalakkersuisut kommunalbestyrelsillu AWG2016-imi sikumi arsaarariarlutik Iqalunnukartussat aammalumi Iqalunni innuttaasut nuannersumik misigisaqartinnissaat suleqataaffigerusummassuk. Maani Iqalunni suleqatigiinnermut annertuumik tapersersuisoqarnera malugivarput, amerlasuunillu eqqaamaneqarluarpoq 2002-mi Nunavut Nunattalu peqatigiillutik aaqqissuisuusimaneranni misilittagaqarfiulluartut, General Manager Maliina Abelsen oqarpoq.
Naalakkersuisunik kommunalbestyresimillu isumaqatigiissusiornerit saniasigut AWG2016-ip ataatsimeeqatigai Iqalunni sikumi arsaarartartut peqatigiiffiat, kultoorikkut suliniuteqartut, tusagassiorfiit, peqatigiiffiit, tapersersuerusussinnaasut suleqatissallu.
- Ullut ulapaarfiit nuannersullu ilikkagaqarfiulluartunik ataatsimiinerpassuartallit ingerlasimalerput. Maani ataatsimeeqatigisarpassuagut iluaqutigalugit takorloorsinnaalerparput AWG2016-ip sikumi arsaararnermik aaqqissuussinissartaata maani Iqalunni ingerlanneqartussap qanoq ittuunissaa aammalu kikkut suliniutip naammassilluarnissaanut akisussaaqataassanersut.
AWG2016-imi timersuutit 15-t unammiuaarfiussapput. Taakkunannga 14-t Nuummi ingerlanneqassapput, taamaallaallu sikumi arsaararneq Iqalunni ingerlanneqassalluni. Sikumi arsaararneq Canadami nuannarineqarluartuuvoq, taamaammallu unammiuaarnissat Iqalunni ingerlanneqarnissaat iluarisimaarneqarluarpoq. Taamaattoq Kalaallit Nunaat taannaavoq timersuutinut ingerlanneqartussanut tamanut akisussaalluni ingerlatsisuusoq.