Tapiissuteqartussanut AWG-mik aqutsisut toqqammavilersuutaat

Aaqqissuussaq Arctic Winter Games 2016 Kalaallit Nunaata oqaluttuarisaanerani taamatut suliat annersarivaat.
2002-mi ingerlanneqarsimasunut quliusunut naleqqiullugit martsimi 2016 unammissutissat 15-inik amerlassuseqassapput. Timersortartut, kulturimik sammisallit, tusagassiutinik ingerlatallit 1.700 missaanniik amerlassusillit, minnerunngitsumillu piumassutsiminnik akissarsiaqaratik ikiuuttussat 1.500-nit ikinnerunngitsut tassani katerisimaarnissarsuarmi peqataassapput. Nuuk ishockeymik ingerlatsiffiusinnaanngittumik peqanngimmat, unammissutissaq taanna Iqalunni ingerlanneqassaaq.
Suliassaq taanna angisuujuvoq inuiaqatigiinnullu kalaallinut pingaaruteqartussaalluni, taamaattumillu iluatsilluartumik naammassineqassappat, inuussutissarsiutillit, timersoqatigiiffiit, kommunit aamma allarpassuit suleqatigilluarnissaat qitiulluinnaqqissaassaaq.  Inuit pikkoriffigisatik malillugit ikiuunnissaat tamanit atorfissaqartinneqarpoq.
Anguniagaavortaaq piffissaq taanna iluatsillugu periarfissatsialak atorluarnissaa, Nunatsinni ilippanartut pisinnaasallu takutinnissai ineriartortinnissaalu. Taassumap ingerlanneqarnerpiaa kisiat tusagassiutitigut malinnaavigineqassanngilaq, aammali taassumap tungaanut, tassa 2016-ip tungaanut, tusagassiutitigut avammut saqqumilaarfiussaaq. Tamannarpiaavorlu aamma suliffeqarfiit ingerlatsiviilluunniit allat suugaluit nittarsaassinissaminnut periarfissaat pitsaasoq.
Ingerlatassarli aatsaat piviusunngortinneqarsinnaavoq aningaasatigut allatulluunniit tunissuteqarnikkut tapersersuisoqarluarpat. Tamanna sulisunik atukkiinikkut imaluunniit sullisseqataanikkut imaluunniit aningaasanik toqqaannartumik tunissuteqarnikkut pisinnaavoq.
Ingerlatassatsinnut tapersiisinnaaneq eqqarsaatigalugu toqqammavissaqqissutut una allakkiannguaq suliarisimavarput. Unalu, AWG 2016-imik ingerlatsisut tapersiiniartunut toqqammavissiaa, tigoriarussiuk ilissinnut eqqarsaatigillaqqunaqaaq, ilissi suliffissi/ingerlatseqatigiiffissi qanoq ililluni tapersersuinini piviusunngortikkusunneraa. Isummersoreerussi uagut piareersimajuarpugut peqatigalusi isumaqatigiissummik tamatta atsiugassatsinnik sanaqatigiinnissamut; taanna ilissinnut, uagutsinnut amma ilissi sulisussinnut iluaqutaasussaassaaq.
 
Tapeeriaatsit assigiinngitsut arfinillit
 
·         Tapeeriaaseq – ilisarnaataa Nanoq Kr. 1 mio. qaffasinnerusorluunniit
·         Tapeeriaaseq – ilisarnaataa Nattoralik         Kr. 700.000 – 999.999
·         Tapeeriaaseq – ilisarnaataa Kissaviarsuk     Kr. 400.000 – 699.999
·         Tapeeriaaseq – ilisarnaataa Tulugaq            Kr. 200.000 – 399.999
·         Tapeeriaaseq – ilisarnaataa Aqisseq             Kr. 75.000 - 199.999
·         Tapeeriaaseq – AWG’p ikinngutai     Kr. 1.000 – 74.999
 
Tapiissutiginiakkat aningaasaasinnaapput, imaluunniit atortussat arlaannut atuinnariaasinnaapput, imaluunniit AWG-mik sullissinikkut nukiit atukkat.
Atortussiaappata, allaganngorlugit aamma akitsuuserneqartigatik akii nalunaarneqassapput. Sullissineruppatali nal. akunneri qassit aamma qanoq akillit nalunaarutigineqassapput.
Aamma periarfissaqarpoq isumaqatigiissusiortoqarnissamut, soorlu sulisumik AWG-mut atukkiussinikkut, nammineq taassumap suleqataanermigut misilittagarilikkani aamma attavigissaalernini tamatuma kingorna suliffimminut iluaqutissanngortissinnaammagit. 

Immikkut aamma tapiissutigineqarsinnaapput
 
-          Qaqqivissaliani (arenaer) logonik allanilluunniit allagartalersuinerit
-          Nammattakkat, vestit, natsallu ikiuuttunut
-          Unammeqataasunut sinngup puui
-          Unammeqataasunut taskersuit
-          Allagartarsuit aallarffisanik apuuffissanillu allannillit, silami unammissutissanut
-          Sisoraatinik sangusaartartut aamma snowboardertut portissaat
-          Alpinertut, snowboardertut, sneskolerlutik arpaliuttut aamma biathlonertut normussaat naqitat
-          Timersoqataasut aamma/imaluunniit ikiuuttut nerisaqartinneqarnissaat
-          Sanasutut, kallerup innilerisutut, qalipaasutut, saffiuutut suliassat
-          Bussinik, taxanik aallatulluunniit aqqusinikkut angallassineq
-          Najoqqagassat aamma imeq
-          Siniffissat
-          Pisattanik angallassineq
-          Sunik sananissamut atugassat qisuit, gipspladet, krydsfinerpladet allallu
-          Isiginnaartut inissaat nikisinneqarsinnaasut/nuunneqarsinnaasut
-          Kulturisiornermi atortut, soorlu silami nipilersuutinut atugassat
-          Unammisunik/pisunilluunniit allanik assigiinngitsunik assilisassanik suliaqarneq
-          Atortorissaarutit, soorlu tablets, pc’t, skærmit, printerit, assigisaalu it-mut tunngasut
-          Unamiuaarutini assigiinngitsuni atortussat assigiinngitsut:
o   Arsat, isikkamik arsarnermi, sulorarnermi (badminton), bordtennisernermi, basketballernermi aamma volleyballernermi atugassat
o   Bordtennisernermi nerriviit
o   Illup iluani unammiuaarnermi natermi allequttat
o   Atortussat Inuit Pinnguaataannut atugassat
 
Aamma ajornanngilaq suliffeqarfiit ilaata sulisumi ilaat ataaseq AWG-mut atukkiutissappagu, taava allanik kajumissutsiminnik sulisunik ilalerluni suliassaqarfiit ilaat isumagisinnaavaat.
Soorlu makkuusinnaapput: 
 
-          Attaveqaqatigiinneq (Kommunikation)
-          Nammineq kajumissutsiminnik sulisut
-          Ingerlatsinerup avammut nittarsaannissaa aamma nutaarsiassaqartitsiniarneq
-          Suulluunniit pisiassat taakkulu apuussortarnissaat (logistik)
Kajumissutsiminnik sulisut aamma naapittarfeqartussaapput, taannalu isumagineqartariaqarpoq. Tassani AWG-p ingerlannerani allaffeqassapput, katerittarfeqarlutik aamma nerisarfeqarlutik. Unalu pineqartoq soorlu suliffeqarfimmit, timersoqatigiiffimmit imaluunniit suliniaqatigiiffimmit ataatsimit tamarmi isumagineqarsinnaagaluarpoq.
 
Taava taassuminnga ingerlatsisussap akerlianik suna pissarsiarissavaa?

Apeqqutaatillugu tapeeriaaseq sorleq qinersimanerlugu, ingerlatsisussap suliffimmi nittarsaannissa AWG 2016-ip ingerlanneqarnerata nalaani ajunngitsorsiassatut pissavaa.
Isumaqatigiissuteqarluni atsioqatigeereernerup kingorna assigiinngitsunik AWG 2016-imit arlalinnik qinigassanik ajunngitsorsiassaqarpoq, soorlu: 
 
-          AWG-p maskottia suliffeqarfiup sulisuminik nuannatsitsinerani/katersuutsitsinerani atorsinnaavaa.
-          Qitornaq nalliuttoq qaaqqusinermi AWG-p maskottia atorsinnaavaa.
-          Suliffeqarfik illoqarfimmi allami immikoortortaqarfeqarpat, tassunga AWG-p maskottia ”aallartillugu” atorsinnaaavaa.
-          Suliffeqarfimmi sulisunik Inuit Pinnguaataannik imaluunniit Dene Gamesimik unammiuaartitsineq.
-          Suliffeqarfigisap sulisuinik AWG pillugu oqalugiarnermut tusarnaariaqqusineq, soorlu aamma sammineqarsinnaalluni kajumissutsimik suleqataanerup oqaluttuarinera immaqalu oqallitsillugit taamatut suleqataareernermi misigisat suut suliffeqarfimmut iluaqutissatut ”eqqunneqarsinnaanersut”
 
Allanilluunniit ingerlataqarusukkaanni, tamanna isumaqatigiissuteqarnikkut piviusunngortinneqarsinnaavoq.
Isumaqatigiissusiorluni sammerusutat ingerlakkusututat suugaluartut isumaqatigiissummut tamarmik allanneqassapput. Suut Nuup avataani suliariniaraanni angalaneq tassaniinnerlu suliffeqarfiup nammineq akilissavai. 

 Tapiissuteqarusullutit periarfissat assigiinngitsut pillugit paasisaqarnerorusukkuit AWG2016'mi Tapiisuteqarnermut attaveqaat Aviâja Lyberth Lennert uunga attavigisinnaavat: aviaja@awg2016.gl